Oct 26 2007
Mga Kuwento ni Lola Chayong…
Hello sa lahat! Na-aalala ko lang ang mga kuwento ni Lola Chayong nung mga bata pa tayo. Isang kuwento niya ay nagmula sa panahon ng Hapon.
“Ako lamang at ang mga nanay ninyo dahil ang Lolo ninyo ay nagtratrabaho. Isang gabi, bumili ako ng ilang salop ng bigas. Delikado noong mga panahong iyon na maglakad ang isang babae sa gabi dahil maari kang katuwaan ng mga Hapon.”
“Habang naglalakad ako at bitbit ko ang ilang salop ng bigas, nagdarasal ako na sana ay iligtas ako sa anumang sakuna. Maraming mga sundalong Hapon na nagkalat sa daan. Taimtim ang dasal ko at nagmamadali akong maglakad. May nakita akong isang babaeng may kasamang bata na bitbit ang kanyang tsinelas. Sumigaw ako, “Ale, puwede po bang maghintay kayo at sasabay ako sa inyong maglakad?” Hindi raw lumingon ang ale, at mabilis ang paglakad. Pilit daw sinundan ni Lola Chayong ang mag-ina.
Tuloy-tuloy ang lakad ng mag-ina. Habol pa rin si Lola Chayong hanggang sa halos malapit na siya sa bahay. Pag-ikot sa kanto, sinundan ni Lola ang mag-ina. Ngunit ng siya ay umikot sa kanto, nawala na sa paningin niya ang mag-ina. Hindi niya malaman kung saan nagpunta. Nakarating si Lola Chayong sa bahay ng mapayapa pero iniisip niya kung saan nagpunta ang mag-ina. Pumunta siya sa altar at nagpasalamat sa Diyos at siya ay di napahamak. Nakita niya ang litrato ng Ina ng Laging Saklolo at kinilabutan siya. ”
Viewed 637 times by 216 viewers
